ខេត្តកំពង់ស្ពឺ៖ ក្នុងយុទ្ធនាការបិទបញ្ចប់នៃការឃោសនារកសម្លេងឆ្នោត នាព្រឹកថ្ងៃទី២១ ខែកក្កដា ឆ្នាំ២០២៣នេះ ឯកឧត្តម វ៉ី សំណាង ប្រធានបក្សខេត្តកំពង់ស្ពឺ មានភាពជឿជាក់ថា សម្រាប់ក្របខណ្ឌខេត្តកំពង់ស្ពឺ គណបក្សប្រជាជនកម្ពុជានឹងទទួលបានសម្លេងគាំទ្រពីប្រជាពលរដ្ឋយ៉ាងច្រើនលើសលុប និយាយជារួមគឺ ឈ្នះភ្លូកទឹកភ្លូកដី។ នេះដោយមើលឃើញពីការចូលរួមយ៉ាងផុលផុស និងគ្រប់ទីកន្លែងរបស់ប្រជាពលរដ្ឋដែលជាសមាជិកសមាជិកា ដែលគាំទ្រនិងស្រឡាញ់គណបក្សប្រជាជនកម្ពុជា ក្រោមការដឹកនាំរបស់សម្តេចតេជោ ហ៊ុន សែន។
ឯកឧត្តម វ៉ី សំណាង លើកឡើងថា ប្រជាពលរដ្ឋ នឹងមិនទុកឱកាសរបស់ពួកគាត់ចោលនោះទេ ពួកគាត់នឹងទៅបោះឆ្នោតជូនគណបក្សប្រជាជនកម្ពុជា ដែលមានលេខរៀងទី១៨ រូបទេវតាបាចផ្កាជាសម្គាល់។ ដូច្នេះបើគណបក្សប្រជាជនកម្ពុជាឈ្នះឆ្នោត គណបក្សប្រជាជនកម្ពុជានឹងបង្កើតនូវសមិទ្ធិផលថ្មីៗបន្ថែមទៀត ពិសេសកែប្រែនូវហេដ្ឋារចនាសម្ពន្ធ័រូបវន្ត័នានា ដែលនៅសេសសល់រយៈកាលកន្លងមកដែលប្រជាពលរដ្ឋត្រូវការ។
ទន្ទឹមនឹងនោះដែរគណបក្សប្រជាជនកម្ពុជានឹងបង្កើននូវការកៀរគរអ្នកវិនិយោគដើម្បីដាក់ទុនរកស៊ីនៅក្នុងទឹកដីខេត្តកំពង់ស្ពឺ ហើយតាមរយៈនៃការដាក់ទុនរកស៊ីនេះ នឹងបង្កើតឱកាសការងារជូនប្រជាពលរដ្ឋ កាលណាមានការងារធ្វើពលរដ្ឋនឹងមានប្រាក់ចំណូលសម្រាប់ផ្គត់ផ្គង់គ្រួសារ ដែលឈានទៅកាត់បន្ថយភាពក្រីក្រ។ មួយវិញទៀតតាមរយៈការងារនេះ ប្រជាពលរដ្ឋមិនបាច់ធ្វើចំណាក់ស្រុកទៅរកការងារធ្វើនៅខេត្តនេះ ខេត្តនោះ ឬប្រទេសជិតខាងទៀតទេ ដែលបង្កឱ្យមានហានិភ័យដល់សុខសុវត្ថិភាព។
ឯកឧត្តម វុី សំណាង បានលើកឡើងដែរថា គណបក្សប្រជាជនកម្ពុជានឹងបន្តជំរុញលើកកម្ពស់ជីវភាពពលរដ្ឋតាមរយៈការផ្តល់ឱកាសការងារពីការដាក់ទុនវិនិយោគរកស៊ីរបស់អ្នកវិនិយោគនានា។ ដូច្នេះប្រជាពលរដ្ឋជឿជាក់លើការដឹកនាំរបស់គណបក្សប្រជាជនកម្ពុជា ពិសេសមគ្គុទេសក៍ដ៏ឈ្លៀសវៃនៃយើងគឺសម្តេចតេជោ ហ៊ុន សែន៕
