ខេត្តកណ្តាល ៖ ក្រោយពីសារព័ត៌មានបានបន្តចេញផ្សាយជុំវិញករណីប្រជាពលរដ្ឋ និងក្រុមអាជីវករបាននាំគ្នាស្នើសុំដល់សម្តេចតេជោ ហ៊ុន សែន ប្រធានព្រឹទ្ធសភា និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា មេត្តាជួយអន្តរាគមន៍ដោះស្រាយអោយក្រុមគ្រួសារក្រីក្រឈ្មោះ កើត ភូ និងប្រពន្ធឈ្មោះ អឹម អូន ដែលត្រូវបានបុគ្គលឈ្មោះ កែវ កុសល និងឈ្មោះ សម្រស់ រំលោភបំពានយកតូបលក់ដូររបស់គាត់ ។ ហើយមូលហេតុដែលមានការស្នើសុំដល់សម្តេចបែបនេះ ដោយសារជនរងគ្រោះបានស្នើសុំអភិបាលស្រុកកោះធំ លោក ឆែ វណ្ណឌី មិនព្រមដោះស្រាយរឿងទីតាំងលក់ដូរ បែរជាបង្វែរសាច់រឿងរៀបចំសណ្តាប់ធ្នាប់ ។ ដោយជនរងគ្រោះកើតទុក្ខមិនសុខចិត្ត ក៏ដាក់ពាក្យប្តឹងស្នើសុំអន្តរាគមន៍ពីអភិបាលខេត្តកណ្តាល ឯកឩត្តម គួច ចំរើន ជួយដោះស្រាយរកយុត្តិធម៌ ហើយត្រូវលោក ឆែ វណ្ណឌី អភិបាលស្រុកកោះធំធ្វើរបាយការណ៍បង្វែរសាច់រឿងភូតកុហក់អភិបាលខេត្តកណ្តាលទៀតនោះ ។
ឥឡូវអភិបាលស្រុកកោះធំ លោក ឆែ វណ្ណឌី បានចេញលិខិតបំភ្លឺមួយទៀតចុះថ្ងៃទី ២៥ ខែ តុលា ឆ្នាំ ២០២៤ ។ ក្នុងលិខិតបំភ្លឺមានចំណុចមួយចំនួនអាចធ្វើអោយមហាជន ជាពិសេសថ្នាក់ដឹកនាំមានការភាន់ច្រឡំ ។ ពីព្រោះក្នុងលិខិតបំភ្លឺនោះបានសរសេរថា ឈ្មោះ អុឹម អូន គ្មានតូបលក់ដូរទេ ។ ចំណុចនេះ ឈ្មោះ អុឹម អូន បានប្រាប់អោយដឹងថា បើនិយាយថា គ្មានតូប ក៏និយាយចឹងទៅចុះ ! ព្រោះកាលណោះគណៈកម្មការផ្សារលក់ថ្លៃពេកវាស់ម៉ែត្រលក់រាប់ពាន់ដុល្លារថ្លៃតូបនីមួយៗ គាត់មិនមានលុយទិញទេ ។ អញ្ចឹងហើយបានគាត់សុខចិត្តបង់វិភាគទាន ៣០០ ដុល្លារ យកទីតាំងលក់នៅលើការ៉ូឡាជាប់ចិញ្ចើមផ្លូវលេខ ២១ ក្រោមសំយ៉ាបដំបូលផ្សារតាមការបែងចែករបស់គណៈកម្មការផ្សារ ។ ហើយការបែងចែករបស់គណៈកម្មការផ្សារដែលបានបែងចែកអោយគាត់លក់លើការ៉ូឡាមិនមែនមានតែគាត់ម្នាក់ទេ គឺមានអាជីវករច្រើននាក់ទៀតបានលក់ដូរនៅលើការ៉ូឡាជាប់ចិញ្ចើមផ្លូវលេខ ២១ និងផ្លូវបេតុងជុំវិញក្រោមសំយ៉ាបដំបូលផ្សារ ហើយម្នាក់ៗសុទ្ធតែមានបង្កាន់ដៃបង់ប្រាក់ដូចៗគ្នា ។
ក្នុងលិខិតបំភ្លឺដដែលបានសរសេរទៀតថា ក្នុងកំណត់ហេតុនៅរដ្ឋបាលស្រុកកាលពីថ្ងៃទី ២៨ ខែ សីហា ឆ្នាំ ២០២៤ លោកស្រី អុឹម អូន បានបញ្ជាក់ច្បាស់ខ្លួនឯងថា គ្មានតូបទេ គឺលក់នៅលើសំយ៉ាបជាប់ផ្លូវជាតិលេខ ២១ មុខផ្សារកោះធំ ។ ឈ្មោះ អុឹម អូន បានបញ្ជាក់ទៅវិញថា គាត់មិនបានលក់នៅលើសំយ៉ាបទេ សំយ៉ាបគឺដំបូលផ្សារគាត់លក់នៅលើដំបូលផ្សារមិនកើតទេ គឺលក់នៅលើការ៉ូឡាជាប់ចិញ្ចើមផ្លូវលេខ ២១ ដូចអាជីវករផ្សេងទៀតដែរ ។
នៅក្នុងកំណត់ហេតុរបស់រដ្ឋបាលស្រុកកោះធំដែលសរសេរថា ឆ្នាំពីរពាន់ម្ភៃបួន ខែសីហា ថ្ងៃទីម្ភៃប្រាំបី បានស្រង់ចម្លើយរបស់លោកស្រី អុឹម អូន បញ្ជាក់ថា គាត់បានលក់នៅលើការ៉ូឡាក្រោមសំយ៉ាបដំបូលផ្សារជាយូរមកហើយ ។ លោកស្រី អុឹម អូន បញ្ជាក់ទៀតថា នៅក្នុងកំណត់ហេតុ គាត់បានឆ្លើយអញ្ចឹងមែន គឺកាលណោះខាងស្រុកបានហៅគាត់ទៅដោះស្រាយរឿងគាត់លក់នៅលើចិញ្ចើមផ្លូវ២១លើផ្លូវកៅស៊ូ ពីព្រោះទីតាំងកន្លែងគាត់លក់លើការ៉ូឡាត្រូវបានឈ្មោះ កែវ កុសល និងឈ្មោះ សម្រស់បំពានយកហើយ ។ ដោយសារតែអត់មានកន្លែងលក់ ដេញគេមិនចេញ គាត់ក៏បង្ខំចិត្តលក់លើផ្លូវកៅស៊ូចិញ្ចើមផ្លូវជាប់ខាងមុខអ្នកបំពានតូបគាត់ ទើបស្រុកបានហៅគាត់ទៅដោះស្រាយរឿងលក់លើផ្លូវ ប៉ុន្តែមិនបានដោះស្រាយរឿងគេបំពានដណ្តើមយកតូបគាត់តាមពាក្យបណ្តឹងរបស់គាត់ទេ ។
សូមជម្រាបថា ដោយសារតែមានការឈឺចាប់ជំនួសជនរងគ្រោះ ក្រុមអាជីវករនៅតែទទូចស្នើសុំឯកឩត្តម គួច ចំរើន អភិបាលខេត្តកណ្តាល ជាពិសេសសម្តេចតេជោ ហ៊ុន សែន និងសម្តេចមហាបវរធិបតី ហ៊ុន ម៉ាណែត មេត្តាជួយអន្តរាគមន៍ដោះស្រាយរកយុត្តិធម៌អោយជនរងគ្រោះផង ។ ក្នុងពាក្យបណ្តឹងឈ្មោះ កើត ភូ និងឈ្មោះ អុឹម អូន បានបញ្ជាក់ថា កាលពីឆ្នាំ២០១៩ (កូវីដ- ១៩) បានឆ្លងចូលក្នុងប្រទេសកម្ពុជា អាជ្ញាធរបានអោយអាជីវករក្នុងផ្សារកោះធំ ព្រមទាំងពួកគាត់ចេញមកលក់ដូរខាងក្រៅផ្សារនៅតាមចញ្ចើមផ្លូវ២១មុខផ្សារ ។ លុះក្រោយបញ្ចប់កូវីដ-១៩ ក្នុងឆ្នាំ២០២០ គណៈកម្មការផ្សារបានកែលម្អ ផ្សារឆ័ត្រកន្លែងចំណតឡានម៉ូតូ ដោយធ្វើដំបូលតាមរយៈបង់វិភាគទាន ក្នុងនោះពួកគាត់បានចូលរួមបង់ប្រាក់ចំនួន៣០០ដុល្លារផងដែរ ។ គណៈកម្មការផ្សារក៏បានបែងចែកទីតាំងតូបអោយគាត់នៅទីតាំងដែលឈ្មោះ កែវ កុសល និងឈ្មោះ សម្រស់ កំពុងលក់សព្វថ្ងៃ។ បន្ទាប់ពីក្រុមគ្រួសារត្រលប់មកពីប្រទេសវៀតណាមវិញ ស្រាប់តែឃើញឈ្មោះ កែវ កុសល និងឈ្មោះ សម្រស់ បានរំលោភបំពានចូលលក់ដូរក្នុងទីតាំងតូបរបស់គាត់ ។ ក្រោយមកគាត់ក៏បានប្រាប់ទៅឈ្មោះអាជីវករទាំងពីរខាងលើ អោយចេញពីទីតាំងលក់ដូររបស់គាត់ ប៉ុន្តែទោះជាប្រាប់យ៉ាងណាក៏ដោយ ក៏អ្នកទាំងពីរមិនព្រមចេញរហូតធ្វើអោយរូបគាត់ពីនាក់ប្តីប្រពន្ធមានការទាល់ច្រកដោយមិនមានកន្លែងលក់ដូរ ទើបសម្រេចចិត្តធ្វើរ៉ឺម៉កម៉ូតូដឹកជញ្ជូនទំនិញទៅដាក់ទីតាំងលក់នៅលើចិញ្ចើមផ្លូវខាងមុខតូបរបស់ខ្លួនទាំងបង្ខំចិត្ត ។ បន្ទាប់មកពួកគាត់ក៏បានដាក់ពាក្យប្តឹងសុំអោយអាជ្ញាធរស្រុកកោះធំជួយដោះស្រាយដេញឈ្មោះ កែវ កុសល និងឈ្មោះ សម្រស់ អោយឈប់លក់ដូរនៅទីតាំងតូបរបស់គាត់ ប៉ុន្តែអាជ្ញាធរស្រុកហាក់គេចវេសមិនដោះស្រាយចេះតែរុញដាក់គ្នាម្តងអោយគាត់ទៅជួបអ្នកនេះអ្នកនោះ ហើយមិនត្រឹមតែមិនដោះស្រាយទេ ថែមទាំងមកដេញឈប់អោយគាត់លក់នៅលើចិញ្ចើមផ្លូវខាងមុខតូបរបស់គាត់ ដោយក្រោមលេសរៀបចំសណ្តាប់ធ្នាប់ ។ ការរៀបចំសណ្តាប់ធ្នាប់របស់អាជ្ញាធរ គឺពិតជាត្រឹមត្រូវ ពួកគាត់គាំទ្រ ហើយក៏បានផ្តិតមេដៃលើកិច្ចសន្យាឈប់លក់ដូរលើចិញ្ចើមផ្លូវជាតិលេខ ២១ ទៀតផង ។ ប៉ុន្តែអ្វីដែលពួកគាត់ហួសចិត្តនោះ គឺលោកអភិបាលស្រុកមិនបានកោះហៅគាត់ទៅដោះស្រាយតាមពាក្យបណ្តឹងរឿងគេរំលោភបំពានយកតូបលក់ដូររបស់គាត់ទេ បែរជាធ្វើរបាយការណ៍ដាក់ជូនឯកឩត្តមអភិបាលខេត្តកណ្តាលដោយអមជាមួយស្នាមមេដៃរបស់គាត់ដែលបានផ្តិតលើកិច្ចសន្យាឈប់លក់ដូរលើចិញ្ចើមផ្លូវទៅវិញ ។ នេះជាសក្ខីភាពដែលលោក ឆែ វណ្ណឌី អភិបាលស្រុកកោះធំកាន់តែមានចេតនាបង្វែរសាច់រឿងអោយឯកឩត្តម គួច ចំរើន អភិបាលខេត្តកណ្តាលកាន់តែមានការភាន់ច្រឡំលើជនរងគ្រោះថែមទៀត ។ អញ្ចឹងហើយទើបបណ្តឹងសុំអន្តរាគមន៍នៅជាប់គាំងជាងមួយខែហើយនៅមិនទាន់មានដំណោះស្រាយរហូតសាមីជនរងគ្រោះអស់ទំនុកចិត្តចំពោះអភិបាលស្រុកកោះធំរូបនេះ ក៏សម្រេចចិត្តពឹងពាក់អ្នកសារព័ត៌មានជួយផ្សព្វផ្សាយព័ត៌មាន ដើម្បីស្នើសុំដល់សម្តេចតេជោ ហ៊ុន សែន និងសម្តេចបវរធិបតី ហ៊ុន ម៉ាណែត ជួយដោះស្រាយរកយុត្តិធម៌អោយពួកគាត់ ៕
