(ចេញផ្សាយនៅថ្ងៃទី០៧ ខែកក្កដា ឆ្នាំ២០២២)
ខេត្តកំពង់ចាម៖ បញ្ហាល្បែងស៊ីសងខុសច្បាប់គឺជាអំពើល្មើសច្បាប់ ដែលរាជរដ្ឋភិបាលកម្ពុជា ដែលមានសម្តេចតេជោហ៊ុនសែន ជានាយករដ្ឋមន្ត្រីនៃកម្ពុជា សម្តេចលោកតែងតែចេញបទបញ្ជាដល់អាជ្ញាធរនិងសមត្ថកិច្ចគ្រប់រាជធានីខេត្ត ត្រូវនាំគ្នាទប់ស្កាត់និងបង្ក្រាបអោយខាងតើបាន ដើម្បីអនុវត្តនូវគោលនយោបាយភូមិឃុំសង្កាត់មានសុវត្ថភាពទាំង៧ចំណុច បើយើងក្រឡេកមកមើលសៃវេនបញ្ជល់មាន់និងបាញ់អាប៉ោងដ៏ធំមួយកន្លែងស្ថិតនៅភូមិស្គន់ ឃុំសូទិព្វ ស្រុកជើងព្រៃ ខេត្តកំពង់ចាម កំពង់បើកទទួលក្រុមអ្នកញៀនល្បែងឲ្យចូលលេងយ៉ាងគគ្រឹកគគ្រេង ដោយភ្នាល់ដាក់ប្រាក់ចាប់ពី ១០០០ដុល្លារ រហូតទៅដល់៥០០០ដុល្លារ ក៏មានដែរ ចំណែកលោក នួន ម៉េងហួរ អធិការនគរបាលស្រុកជើងព្រៃ បានរក្សាភាពស្ងៀមស្ងាត់។
យោងតាមប្រភពនៅតាមរោងកាហ្វេ បានឲ្យដឹងនឹងរិះគន់ចំៗថា ទីតាំងសៃវែននិងបាញ់អាប៉ោងខាងលើជារបស់ លោក កាំង គឹមហុង មានតួនាទីជាអធិការរងទទួលផែនព្រហ្មទណ្ឌ មិនគួរណាលោកមកបើសៃវេនបញ្ជល់មាន់និងបាញ់អាប៉ោង ដើម្បីទទួលក្រុមអ្នកញៀនល្បែងអោយចូលលេងយ៉ាងពពាក់ពពូនដោយមិនគិតពីតួនាទីរបស់ខ្លួនជាអ្នកបង្ក្រាបបទល្មើស នឹងមានឈ្មោះលោក ទី ជាកូនអុកសម្រាប់ជួយសម្របសម្រួលដល់កម្លាំងជំនាញពាក់ព័ន្ធមួយចំនួនផងដែរ តើឯណាទៅភូមិឃុំមានសុវត្តិភាព បើល្បែងស៊ីសងប្រមូលផ្ដុំគ្នាលែងស្រែកហូរកញ្ចៀវត្រហឹងអឹងកងយ៉ាងរំពងភូមិហើយនោះ!
តាមប្រភពសូមមិនបង្ហាញអតីតសញ្ញាណបានឲ្យដឹងថា លោកអធិការរងស្រុកជើងព្រៃទទួលផែនព្រហ្មទណ្ឌ ឈ្មោះកាំង គឹមហុង បានបើកល្បែងស៊ីសងនៅទីតាំងផ្ទះរបស់ខ្លួន នៅខាងក្រោយហាងលក់បាយយីហោ៩៩ ដោយចាប់បើកពីម៉ោង១១ ថ្ងៃត្រង់ រហូតដល់ល្ងាច យ៉ាងគឃ្លើនមិនខ្លាចច្បាប់ទេ ដោយសំអាងថា ខ្លួនជាអធិការរង មានអំណាចពេញដៃ ហើយកន្លងមកកូនចៅរបស់អធិការរូបនេះ បានដេញវាយអ្នកកាសែត ដែលផ្សាយពីបទល្មើសរបស់ខ្លួន។
ករណីសៃវេនបញ្ចូលមាន់និងបាញ់អាប៉ោងខាងលើនេះ អង្គភាពសារព័ត៌មានយើងបានរាយការណ៍ជូនលោកវរសេនីយ៍ទោ នួន ម៉េងហួរ អធិការនគរបាលស្រុកជើងព្រៃតាមប្រព័ន្ធតេលេក្រាមលោកចូលមើលហើយមិនឆ្លើយតប។
ពលរដ្ឋសំណូមពរដល់លោកអធិការស្រុកជើងព្រៃ លោកស្នងការនគរបាលខេត្តកំពង់ចាម និងលោកអភិបាលខេត្តកំពង់ចាម មេត្តាចាត់កម្លាំងឲ្យចុះបង្រ្កាបទីតាំងល្បែងស៊ីសងនេះផង កុំឲ្យអធិការរងស្រុកជើងព្រៃ ឈ្មោះកាំង គឹមហុង ធ្វើព្យុះធ្វើភ្លៀងបើកល្បែងស៊ីសងតាមទំនើងចិត្តបែបនេះទៀត៕
