ខេត្តព្រៃវែង ៖ ក្រោយពីរសម្ដេចតេជោ ហ៊ុន សែន ប្រមុខរាជរដ្ឋាភិបាលនៃកម្ពុជា និង សម្ដេចក្រឡាហោង ស ខេង ឧបនាយករដ្ឋមន្ត្រីរដ្ឋមន្ត្រីក្រសួងមហាផ្ទៃ បានដាក់បទបញ្ជាយ៉ាងម៉ឺងម៉ាត់ឲ្យបង្ក្រាបបទល្មើសល្បែងខុសច្បាប់គ្រប់ទម្រង់ទូទាំងក្របខណ្ឌនៅក្នុងប្រទេសកម្ពុជា ឱ្យអស់ដោយគ្មានការយោគយល់ ក្រោយពីមានបទបញ្ជាយើងសង្កេតឃើញថា ល្បែងខុសច្បាប់គ្រប់ទម្រង់ទូទាំងប្រទេសបានស្ងប់ស្ងាត់ តែនៅពេលថ្មីៗនេះ គេសង្កេតឃើញមានទីតាំងល្បែងជល់មាន់២កន្លែង កំពុងបើកនៅក្នុងភូមិសាស្ត្រទឹកដីឃុំអ្នកលឿងយ៉ាងគក្រឹកគក្រេងសង្ស័យអាជ្ញាធរមានសមត្ថកិច្ច ឃុំ ស្រុកបើកភ្លើងខៀវ! ទើបបើកលេងបានយ៉ាងរលូន។
បើតាមសេចក្តីរាយការណ៍បានឱ្យដឹងថា៖ ល្បែងជល់មាន់គឺនៅតែពេញនិយមដែលមានទីតាំងទី១- នៅជាប់ព្រំប្រទល់ស្រុកពាមរក៌ និងស្រុកពាមជរ ស្ថិតក្នុងភូមិឧត្តម ឃុំអ្នកលឿង ដែលមានអ្នកចេញមុខបើកលេងឈ្មោះ លីន ដែលជាកូនប្រុសរបស់ពូ វ័រ នៅព្រែកក្របៅ។
ទីតាំងទី២-គឺនៅក្បែរទំនប់ក្រវ៉ាត់ក្រុងអ្នកលឿង ស្ថិតក្នុងភូមិព្រែកតាសរ ឃុំអ្នកលឿង ស្រុកពាមរក៌ ដែលអ្នកបើកលេងមានគ្នាចំនួន៣នាក់
(ចូលហ៊ុនគ្នា) គឺឈ្មោះ ណាង ឈ្មោះ ប្រុស និងឈ្មោះ ចិត្រ។
ហើយត្រូវបានប្រជាពលរដ្ឋនៅស្រុកពាមរក៌ ខេត្តព្រៃវែង នាំគ្នាលេងយ៉ាងគគ្រឹកគគ្រេងជារៀងរាល់ថ្ងៃ ដោយពុំមានការរំខាន ឬចុះបង្ក្រាបពីសមត្ថកិច្ចណាឡើយ។
បើទោះបីជាប្រមុខរាជរដ្ឋាភិបាលសម្តេចតេជោ ហ៊ុន សែន នាយករដ្ឋមន្ត្រី ធ្លាប់បានចេញបទបញ្ជាអោយអាជ្ញាធរ និងសមត្ថកិច្ចគ្រប់ជាន់ថ្នាក់ ត្រូវរួមគ្នាធ្វើការបង្ក្រាបអោយអស់ក៏ដោយ។
ពាក់ព័ន្ធការលេងជល់មាន់ខាងលើនេះ អង្គភាពសារព័ត៏មានយើង មិនអាចទំនាក់ទំនងទៅលោក សេង ពន្លក អធិការនគរបាលស្រុកពាមរក៌ បានទេនៅល្ងាចថ្ងៃទី០១,១២,២០២២នេះព្រោះខលមិនចូល។
មហាជនសុំសំណូមពរដល់លោក ព្រុំ សន្ធរស្នងការខេត្តព្រៃវែង មានវិធានការក្តៅចាត់កម្លាំងក្រោមឱវាទចុះមកបង្ក្រាបល្បែងស៊ីសងខាងលើនេះផងទាន! ដើម្បីស្របតាមគោលនយោបាយភូមិឃុំមានសុវត្ថិភាព របស់រាជរដ្ឋាភិបាលដែលដាក់ចេញដោយក្រសួងមហាផ្ទៃ៕