ស្វាយរៀង៖ មនុស្ស៦នាក់ បានរងរបួសធ្ងន់ស្រាល ក្រោយពីមានការបោកគ្រាប់បែកដៃចូលក្នុងផ្ទះដែលបង្កឡើងដោយអតីតទាហានចូលនិវត្តន៍ម្នាក់ ដោយសារតែផឹកស្រាស្រវឹងកើតទំនាស់រឿងព្រំដី។ ហេតុការណ៍នេះបានកើតឡើងកាលពីវេលាម៉ោង៨ នឹង១០នាទីយប់ ថ្ងៃទី៧ ខែមីនា ឆ្នាំ២០២៣ នៅភូមិព្រៃគាវ ឃុំកំពង់ចក ស្រុករំដួល។
បើតាមសមត្ថកិច្ចបានឲ្យដឹងថា កន្លងមកគ្រួសារជនបង្ករឈ្មោះ អ៊ុំ ផា ភេទប្រុស មានជម្លោះជាមួយគ្រួសារជនរងគ្រោះរឿងព្រំដី ព្រោះមានផ្ទះជាប់របងជាមួយគ្នា នឹងមិនទាន់ដោះស្រាយបញ្ចប់នៅឡើយ។ ហើយនៅថ្ងៃកើតហេតុ ជនបង្ករបានផឹកស្រាស្រវឹងក៏បង្កជាជម្លោះជាមួយគ្រួសារជនរងគ្រោះ រហូតហ៊ានយកគ្រាប់បែកដែលខ្លួនលាក់ទុកយូរឆ្នាំមកហើយតាំងពីសម័យសង្គ្រាមមកម៉្លេះ គប់ចូលផ្ទះជនរងគ្រោះ បណ្តាលឱ្យផ្ទុះកក្រើកភូមិទាំងយប់ រងរបួសធ្ងន់ស្រាលទាំងគ្រួសារមានជម្លោះ និងអ្នកជិតខាងចំនួន ៦នាក់។
សមត្ថកិច្ចបានឲ្យដឹងទៀតថា ក្រោយកើតហេតុជនសង្ស័យត្រូវសមត្ថកិច្ចចាប់ឃាត់ខ្លួនបានភ្លាមៗ ហើយបញ្ជូនទៅអធិការដ្ឋាននគរបាលស្រុករំដួល ដើម្បីសាកសួរ នឹងបានកសាងសំណុំរឿងបញ្ជូនមកការិយាល័យព្រហ្មទណ្ឌ នៃស្នងការដ្ឋាននគបាលខេត្តស្វាយរៀង ដើម្បីចាត់ការបន្តតាមនីតិវិធី នៅព្រឹកថ្ងៃទី៨ ខែមីនា ឆ្នាំ២០២៣៕